რუსეთი ნებისმიერ მნიშვნელოვან სამშვიდობო ძალისხმევას უარყოფს, ამიტომ დამანგრეველი სანქციები უნდა დაუწესდეს, - ასე გამოეხმაურა უკრაინის საგარეო საქმეთა მინისტრი, ანდრეი სიბიგა 10 ივნისის ღამეს რუსეთის მიერ განხორციელებულ მასშტაბურ საჰაერო იერიშებს.„რუსული ტერორის მორიგი ღამე უკრაინაში. კიევსა და ოდესაზე ასობით დრონისა და ბალისტიკური რაკეტის გამოყენებით მძიმე თავდასხმები განხორციელდა. რუსებმა სამშობიარო სახლსა და საცხოვრებელ კორპუსებს დაარტყეს, რის შედეგადაც მშვიდობიანი მოსახლეობა დაიღუპა და დაშავდა“, - განაცხადა ანდრეი სიბიგამ.მისი თქმით, რუსეთის წინააღმდეგ ახალი სანქციები ახლავე უნდა დაწესდეს.„რუსეთი ნებისმიერ მნიშვნელოვან სამშვიდობო ძალისხმევას უარყოფს, ამიტომ ახალი დამანგრეველი სანქციების წინაშე უნდა აღმოჩნდეს. ლოდინის დრო აღარ არის. ენერგო სექტორი, ნავთობის ფასებზე ლიმიტის დაწესება, საბანკო სექტორი და მეორადი სანქციები ყველაზე მგრძნობიარე სფეროებია“, - აღნიშნა უკრაინის საგარეო საქმეთა მინისტრმა.შეგახსენებთ, 10 ივნისს რუსების მიერ განხორციელებული თავდასხმების შედეგად კიევში 4 ადამიანი დაშავდა, ხოლო ოდესაში ერთი ადამიანი დაიღუპა და 3 დაშავდა.

უკრაინის შეიარაღებული ძალების უპილოტო სისტემების ძალებმა, თავდაცვის ძალების სხვა კომპონენტებთან ერთად, 9 ივნისის ღამეს რუსულ სააქციო საზოგადოება „ზნიირ-პროგრესს“ დაარტყეს, ეს საწარმო „შაჰედებისთვის“ ნაწილებს აწარმოებს და უკრაინის საზღვრიდან ათას კილომეტრზე მეტ მანძილზე მდებარეობს, - ინფორმაციას უკრაინული მედია ქვეყნის შეიარაღებული ძალების გენერალურ შტაბზე დაყრდნობით ავრცელებს.„დარტყმა განხორციელდა სამხედრო-სამრეწველო კომპლექსის ობიექტზე, სადაც „შაჰედების“ ანტენები იწარმოებოდა. დადასტურდა, რომ ობიექტს მინიმუმ ორი უპილოტო საფრენი აპარატი დაესხა თავს და შემდგომში მასშტაბური ხანძარი გაჩნდა. დარტყმის შედეგები ზუსტდება“, - აცხადებენ გენშტაბში.მათი განმარტებით, თავდასხმა განხორციელდა „მტრის საჰაერო თავდასხმის იარაღის წარმოების უნარის შემცირების“ ფარგლებში.ამასთან, გენშტაბის ცნობით, უკრაინის შეიარაღებული ძალების სპეციალური ოპერაციების ძალების ქვედანაყოფებმა 9 ივნისის ღამეს, თავდაცვის ძალების სხვა კომპონენტებთან თანამშრომლობით, რუსეთის ფედერაციის ნიჟნი ნოვგოროდის ოლქში მდებარე „სავასლეიკას“ აეროდრომზე იერიში მიიტანეს.გენშტაბში აცხადებენ, რომ აეროდრომს რუსეთი უკრაინის ტერიტორიაზე დარტყმისთვის იყენებს. კერძოდ, ამ სამხედრო ობიექტიდან რეგულარულად ფრინდებიან „მიგ-31კ“ ტიპის გამანადგურებლები, რომლებსაც „კინჟალის“ აერობალისტური რაკეტები გადააქვთ.„წინასწარი ინფორმაციით, მტრის ორ თვითმფრინავს დაარტყეს (სავარაუდოდ „მიგ-31“-ს და „სუ-30/34“-ს). საბრძოლო მოქმედებების შედეგები ზუსტდება“, - აცხადებენ გენშტაბში.

უკრაინელებმა რუსეთის ტერიტორიაზე განხორციელებული ოპერაცია “ობობას ქსელის” დროს 117 დრონი გამოიყენეს, რომლებსაც ამდენივე ოპერატორი მართავდა, - ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.„თამამად შეგვიძლია ვთქვათ, რომ ეს აბსოლუტურად უნიკალური ოპერაცია იყო. ყველაზე საინტერესო - და ეს უკვე საჯაროდ შეიძლება ითქვას - არის ის, რომ ჩვენი ოპერაციის „ოფისი“ რუსეთის ტერიტორიაზე მდებარეობდა პირდაპირ „ეფ-ეს-ბე“-ს დირექტორატის გვერდით მათ ერთ-ერთ ოლქში“, - განაცხადა პრეზიდენტმა.ამასთან, ზელენსკიმ დაადასტურა სახელმწიფო უსაფრთხოების სამსახურის ინფორმაცია, რომ სტრატეგიული ავიაციის თვითმფრინავების 34%-ს დაარტყეს.მისი თქმით, სამიზნეებზე დარტყმების დროს დრონები ავტონომიურად კი არ მოქმედებდნენ, არამედ ოპერატორები მართავდნენ.„ოპერაციაში სულ 117 დრონი გამოიყენეს და შესაბამისი რაოდენობის დრონების ოპერატორი მუშაობდა“, - აღნიშნა ზელენსკიმ.ამასთან, მისი თქმით, ყველა, ვინც ოპერაციის მომზადებაში მიიღო მონაწილეობა, რუსეთიდან დროულად გაიყვანეს.

უკრაინის ქალაქებზე რუსეთის დარტყმებით ძალიან იმედგაცრუებული ვარ, - ამის შესახებ აშშ-ის პრეზიდენტმა, დონალდ ტრამპმა ოვალურ კაბინეტში ჟურნალისტებს განუცხადა.„ჩვენ პრობლემის ვაგვარებდით და შემდეგ, უეცრად, რაკეტები რამდენიმე ქალაქს ესროლეს და ხალხი დაიღუპა“, - განაცხადა დონალდ ტრამპმა.შეკითხვაზე, რუსეთის პრეზიდენტს, ვლადიმერ პუტინს „კარგ ადამიანად თუ ცუდ ადამიანად“ თვლის, აშშ-ის პრეზიდენტმა პასუხი არ გასცა.„მე ისეთი რაღაცები ვნახე, რამაც გამაკვირვა, ამიტომ ძალიან იმედგაცრუებული ვარ“, - აღნიშნა აშშ-ის პრეზიდენტმა.

რუსეთის პრეზიდენტი ვლადიმერ პუტინი გადაწყვეტილებებს ქვეყნის უსაფრთხოების ინტერესებიდან გამომდინარე იღებს, - ამის შესახებ კრემლის პრესსპიკერმა, დიმიტრი პესკოვმა აშშ-ის პრეზიდენტ დონალდ ტრამპის მიერ პუტინის ქმედებების შესახებ გამოთქმულ უკმაყოფილებასთან დაკავშირებით განაცხადა.„რა თქმა უნდა, მოლაპარაკების პროცესის დაწყება, რისთვისაც ამერიკულმა მხარემ დიდი ძალისხმევა გასწია, ძალიან მნიშვნელოვანი მიღწევაა და ჩვენ ნამდვილად მადლიერები ვართ ამერიკელების, პრეზიდენტ ტრამპის ამ მოლაპარაკების პროცესის ორგანიზებასა და დაწყებაში მათი დახმარებისთვის, ეს ძალიან მნიშვნელოვანი მიღწევაა. რა თქმა უნდა, ამავდროულად, ეს ძალიან მნიშვნელოვანი მომენტია, რაც დაკავშირებულია აბსოლუტურად ყველას ემოციურ გადატვირთვასა და ემოციურ რეაქციებთან. ყურადღებით ვაკვირდებით ყველა რეაქციას. ამავდროულად, პრეზიდენტი პუტინი იღებს გადაწყვეტილებებს, რომლებიც აუცილებელია ჩვენი ქვეყნის უსაფრთხოების უზრუნველსაყოფად“, - განუცხადა პესკოვმა ჟურნალისტებს.კრემლის პრესსპიკერი გამოეხმაურა ტრამპის განცხადებებს, რომელმაც სოციალურ ქსელებში უკმაყოფილება გამოთქვა რუსეთის პრეზიდენტის ბოლოდროინდელი ქმედებების გამო.პესკოვის თქმით, ყველამ იხილა, „თუ როგორ დაემუქრა კიევის რეჟიმი უცხოელ ლიდერებს გამარჯვების დღესთან დაკავშირებით მოსკოვში ჩასვლის წინ“.„კიევის რეჟიმისგან ეს მუქარა ყველამ გაიგო და ბევრმა ლიდერმა, რომლებიც აქ იმყოფებოდნენ, ფაქტობრივად, იხილა კიევის რეჟიმის მცდელობა, ასეთი მნიშვნელოვანი დღის წინა დღეს რუსეთის ფედერაციის ტერიტორიაზე, დიდ ქალაქებსა და დედაქალაქზე დრონებით თავდასხმა განეხორციელებინა. ეს მცდელობები გრძელდება, ჩვენ იძულებულნი ვართ მივიღოთ ზომები და პრეზიდენტი პუტინი აკეთებს იმას, რაც აუცილებელია რუსეთის უსაფრთხოების უზრუნველსაყოფად“, - განაცხადა პესკოვმა.შეგახსენებთ, აშშ-ის პრეზიდენტმა, დონალდ ტრამპმა ჟურნალისტებს განუცხადა, რომ რუსეთის პრეზიდენტ ვლადიმერ პუტინით უკმაყოფილოა.„არ ვიცი, რა ჯანდაბა დაემართა პუტინს, მე მას დიდი ხანია ვიცნობ. ყოველთვის კარგად ვუგებდი. მაგრამ ის ქალაქებში რაკეტებს აგზავნის და ხალხს კლავს და ეს არ მომწონს. არ მომწონს ის, რასაც პუტინი აკეთებს. ოდნავადაც კი არა. ის ხალხს კლავს. ამ კაცს რაღაც დაემართა და ეს არ მომწონს“, - აღნიშნა ტრამპმა.მოგვიანებით ტრამპმა სოციალურ ქსელში დაწერა, რომ პუტინი „აბსოლუტურად გაგიჟდა“.„ყოველთვის ძალიან კარგი ურთიერთობა მქონდა რუსეთის პრეზიდენტ ვლადიმერ პუტინთან, მაგრამ მას რაღაც დაემართა. ის აბსოლუტურად გაგიჟდა! ის კლავს უამრავ ადამიანს და მე მხოლოდ ჯარისკაცებზე არ ვსაუბრობ. უკრაინის ქალაქებს, ყოველგვარი მიზეზის გარეშე, რაკეტებსა და დრონები ესვრიან“, - აღნიშნა ტრამპმა.

რუსეთის ფედერაციის მიერ უკრაინაზე განხორციელებული რეკორდული მასშტაბის კომბინირებული თავდასხმის შედეგად, 12 ადამიანი დაიღუპა და კიდევ 60 დაშავდა, - ამის შესახებ უკრაინის შინაგან საქმეთა მინისტრმა, იგორ კლიმენკომ სოციალურ ქსელში დაწერა.ოფიციალური მონაცემებით, რუსეთის თავდასხმამ 13 რეგიონი დააზარალა: ქალაქი კიევი, კიევის ოლქი, ჟიტომირის, ხმელნიცკის, ტერნოპოლის, დნეპროპეტროვსკის, ნიკოლაევის, ოდესის, ხარკოვის, ჩერნიგოვის, ჩერკასის, სუმისა და პოლტავას ოლქები.თავდასხმის შედებად დაზიანდა 80-ზე მეტი საცხოვრებელი შენობა, დაფიქსირდა ხანძრის 27 კერა. ამ დროისთვის არსებული მონაცემებით, დაიღუპა 12 ადამიანი, 60-ზე მეტი კი - დაშავდა.დაღუპულებს შორისაა სამი ბავშვი ჟიტომირის ოლქში მცხოვრები ერთი ოჯახიდან. მათი მშობლები საავადმყოფოში გადაიყვანეს, დედა მძიმე მდგომარეობაშია.უკრაინის საჰაერო ძალების ინფორმაციით, რუსულმა ძალებმა უკრაინაზე წუხელ კომბინირებული თავდასხმა 367 დრონით და რაკეტით განახორციელეს.

წუხანდელი თავდასხმები კიდევ ერთხელ აჩვენებს, რომ რუსეთი მიდრეკილია უკრაინისთვის მეტი ტანჯვის მიყენებისა და განადგურებისკენ, - ამის შესახებ ევროკავშირის უმაღლესი წარმომადგენელი საგარეო საქმეთა და უსაფრთხოების საკითხებში, კაია კალასი სოციალურ პლატფორმა X-ზე წერს.მისი თქმით, გამანადგურებელია უდანაშაულო მსხვერპლთა შორის ბავშვების ხილვა, რომლებიც დაშავდნენ და დაიღუპნენ.„ჩემი ფიქრები მათ ოჯახებთანაა. ამ ომის შესაჩერებლად რუსეთზე ყველაზე ძლიერი საერთაშორისო ზეწოლა გვჭირდება“, - წერს კალასი.შეგახსენებთ, უკრაინის შინაგან საქმეთა მინისტრმა, იგორ კლიმენკომ განაცხადა, რომ რუსეთის ფედერაციის მიერ უკრაინაზე განხორციელებული რეკორდული მასშტაბის კომბინირებული თავდასხმის შედეგად, 12 ადამიანი დაიღუპა და კიდევ 60 დაშავდა. უკრაინის საჰაერო ძალების ინფორმაციით, რუსულმა ძალებმა უკრაინაზე თავდასხმა 367 დრონით და რაკეტით განახორციელეს.

მოსკოვის მერის, სერგეი სობიანინის განცხადებით, საჰაერო თავდაცვამ 26 დრონი გაანადგურა, რომლებიც დედაქალაქის მიმართულებით მიფრინავდნენ, - ინფორმაციას რუსული მედია ავრცელებს.სობიანინის განცხადებით, დრონების ნამსხვრევების ჩამოვარდნის ადგილზე შესაბამისი სამსახურები მუშაობენ.ამასთან, რუსული მედია „როსავიაციაზე“ დაყრდნობით იუწყება, რომ „დომოდედოვოსა“ და „ჟუკოვსკის“ აეროპორტებში თვითმფრინავების ჩამოსვლასა და გამგზავრებაზე დროებითი შეზღუდვები დაწესდა.

რუსეთმა, პრეზიდენტ დონალდ ტრამპსა და რუსეთის პრეზიდენტ ვლადიმერ პუტინს შორის გამართული სატელეფონო საუბრის შემდეგ, პირობა დადო, რომ აშშ-ს გაუგზავნის პირობებს, თუ რა იქნება საჭირო უკრაინასთან ცეცხლის შეწყვეტის მისაღწევად, - Politico-ს ინფორმაციით, ამის შესახებ აშშ-ის სახელმწიფო მდივანმა, მარკო რუბიომ განაცხადა.„ჩვენი ინფორმაციით, რუსები აპირებენ შეადგინონ პირობები, თუ რა იქნება საჭირო ცეცხლის შეწყვეტის მისაღწევად, რაც შემდგომში უფრო ფართო მოლაპარაკებების საშუალებას გააჩენს. ველოდებით ამ პირობებს და შემდეგ ბევრად უკეთ გავიგებთ ბატონი პუტინის გათვლებს, როგორც კი ვნახავთ, როგორი იქნება ეს პირობები“, - აღნიშნა რუბიომ.გამოცემის ცნობით, სახელმწიფო მდივანმა მიანიშნა, რომ რუსეთისთვის სანქციების დაწესებამ, შესაძლოა, საფრთხე შეუქმნას ვაშინგტონის მოსკოვთან და კიევთან საუბრის შესაძლებლობას.„მას [დონალდ ტრამპს] სურს, რაც შეიძლება დიდხანს შეინარჩუნოს ორივე მხარეზე ზეგავლენის მოხდენის შესაძლებლობა მშვიდობისკენ სვლის კუთხით. როგორც კი გარკვეულ ქმედებებს განახორციელებ, კონფლიქტის ერთ-ერთ მხარეზე გავლენას დაკარგავ“, - აღნიშნა რუბიომ.

დონალდ ტრამპს ვთხოვე, რომ უკრაინის შესახებ გადაწყვეტილებები ჩვენს გარეშე არ მიეღო, - ამის შესახებ უკრაინის პრეზიდენტმა, ვოლოდიმირ ზელენსკიმ ევროპელ ლიდერებთან ერთად აშშ-ის პრეზიდენტთან, დონალდ ტრამპთან გამართული სატელეფონო საუბრის შემდეგ განაცხადა.„პუტინთან საუბრამდე ვთხოვე, რომ უკრაინის შესახებ გადაწყვეტილებები ჩვენ გარეშე არ მიეღო. ჩვენთვის ეს ძალიან პრინციპული და მნიშვნელოვანი საკითხია“, - განაცხადა ვოლოდიმირ ზელენსკიმ.მისი თქმით, უკრაინა თავისი ტერიტორიებიდან ჯარებს არ გაიყვანს.„ჩვენი ტერიტორიებიდან ჩვენს ჯარებს არავინ გაიყვანს. ეს ჩემი კონსტიტუციური მოვალეობაა. არანაირი ულტიმატუმები, არავინ დათმობს თავის მიწებს, თავის ხალხს, თავის სახლებს. თუ რუსეთი ჩვენი ტერიტორიებიდან ჩვენი ჯარების გაყვანის პირობებს წამოაყენებს, ეს ნიშნავს, რომ მათ ომის დასრულება არ სურთ, რადგან მათ ნათლად ესმით, რომ უკრაინა ამას არ გააკეთებს“, - აღნიშნა უკრაინის პრეზიდენტმა.ამასთან, ვოლოდიმირ ზელენსკის ცნობით, თურქეთში, ვატიკანსა ან შვეიცარიაში უკრაინის, რუსეთის, აშშ-ის, ევროკავშირის ქვეყნებისა და დიდი ბრიტანეთის ლიდერების შეხვედრის ორგანიზება განიხილება.

პუტინმა გიგანტი გააღვიძა, მას ჯერ წარმოდგენა არ აქვს რამდენად ძვირად დაუჯდება ეს, - ამის შესახებ პოლონეთის საგარეო საქმეთა მინისტრი, რადოსლავ სიკორსკი X-ის საკუთარ გვერდზე წერს.„პუტინმა გიგანტი გააღვიძა. მას ჯერ წარმოდგენა არ აქვს რამდენად ძვირად დაუჯდება ეს. ევროკავშირის ეკონომიკა 19 ტრილიონ დოლარს შეადგენს. დონალდ ტრამპის პირველი პრეზიდენტობის დასაწყისიდან, ევროპელმა მოკავშირეებმა, კანადასთან ერთად, თავდაცვაზე ხარჯები გააორმაგეს. ახლა კვლავ გავაკეთებთ ამას და უკეთ დავხარჯავთ, ვიდრე წარსულში. რუსეთის ეკონომიკა 2 ტრილიონ დოლარს შეადგენს. როგორც ევროპა, სამშვიდობო მიზნებზე 2.5-ჯერ მეტს გამოვყოფთ, ვიდრე რუსეთი გამოყოფს საომარ ძალისხმევებზე.საკმარისია, რომ უბრალოდ უფრო ჭკვიანურად დავხარჯოთ ფული“, - წერს სიკორსკი.

რუსეთი დღეს დილიდან მოლაპარაკებებისთვის უკრაინის წარმომადგენლებს დაელოდება,- ამის შესახებ სტამბოლში რუსეთის დელეგაციის ხელმძღვანელმა, ვლადიმირ მედინსკიმ განაცხადა.„დილით, დილის 10 საათიდან, დაველოდებით უკრაინულ მხარეს, რომელიც შეხვედრაზე უნდა მოვიდეს“, - განუცხადა მედინსკიმ ჟურნალისტებს.მისი მტკიცებით, რუსეთის დელეგაცია სტამბოლში ჩავიდა პირდაპირი ორმხრივი მოლაპარაკებების წინაპირობების გარეშე წარმოებისთვის. „მზად ვართ სამუშაოდ“, - დასძინა მედინსკიმ.ამასთან, მან ნაყოფიერი უწოდა თურქეთის საგარეო საქმეთა სამინისტროს ხელმძღვანელთან, ჰაკან ფიდანთან გამართულ შეხვედრას, რომელზედაც რუსულმა მხარემ უკრაინის კონფლიქტის მოგვარებასთან დაკავშირებით საკუთარი პოზიცია განმარტა.„დღეს უკვე გვქონდა ძალიან ნაყოფიერი შეხვედრა თურქეთის საგარეო საქმეთა სამინისტროს ხელმძღვანელთან და ჩვენი პოზიცია განვუმარტეთ “, - განაცხადა მედინსკიმ.