ბატონი ჰერჩინსკის განცხადებები მიუღებელია - ბატონო ელჩო, მე მესმის თქვენი შეშფოთება და აღშფოთება, რომ თქვენი აგენტურა ბარიერს ვერ გადალახავს, მაგრამ ეს წინასაარჩევნო კამპანიაში ჩართვის უფლებას არ გაძლევთ, - ამის შესახებ “ქართული ოცნების” დეპუტატმა, ირაკლი ზარქუამ ევროკავშირის ელჩის, პაველ ჰერჩინსკის განცხადებების შეფასებისას განაცხადა.მისი თქმით, პაველ ჰერჩინსკი “ძალიან ზედმეტის უფლებას აძლევს თავს, როდესაც საქართველოს შიდა საქმეებში ერევა”.“ბატონი ჰერჩინსკის განცხადებები მიუღებელია. მათ შორის თავისი არსითა და შინაარსით მიუღებელი საქართველოს მოსახლეობისთვის. ბატონო ელჩო, ძალიან ზედმეტის უფლებას აძლევთ თქვენს თავს, რომ ჩვენი ქვეყნის შიდა საქმეებში ჩაერიოთ. საქართველოს მოსახლეობამ მკაფიოდ გითხრათ, რომ ჩვენ ლგბტ პროპაგანდას არ გავატარებთ, შესაბამისად თქვენ ნახეთ მიტინგი, სადაც მილიონზე მეტი ადამიანი გამოვიდა და თქვენ ჯიუტად მაინც გვაწვებით და ამბობთ, რომ თურმე ლგბტ პროპაგანდის აკრძალვა ადამიანის უფლებების შელახვაა. საქართველოს მოსახლეობის უმრავლესობა არ გეთანხმებით - ეს ერთი. მეორე, თქვენ მოუხმეთ ფაქტებს, თურმე დღეს როგორი მშვიდობაც არის მოლდოვასა და უკრაინაში. აქაც შეუსაბამოა ეს განცხადება. უკრაინაში მშვიდობა არ არის, ბატონო ელჩო - ან გატყუებენ, ან იტყუებით. ეგ უბედურებაა, იქ ტრაგედია ტრიალებს, რომელიც როდის დამთავრდება, კაციშვილმა არ იცის. ჩვენ არ გვინდა ისეთი მშვიდობა, როგორიც უკრაინაშია“, - აღნიშნა ზარქუამ.ამავე თემაზე საუბრისას, ზარქუამ ელჩს კიდევ ერთხელ მოუწოდა, რომ „შეეშვას შიდა არჩევნებში ჩარევას, რადგან ეს მისი მანდატი არ არის“.„კიდევ ერთხელ ვაცხადებთ და მოგიწოდებთ, რომ შეეშვით შიდა არჩევნებში ჩარევას - ეს თქვენი მანდატი არ არის. თქვენი მანდატი არის, როდესაც შესაძლებლობა იქნება, რომ ევროინტეგრაციაში საქართველო დაწინაურდეს, იქ ფეხი არ დაგვიდოთ - მხარი დაგვიჭირეთ. ჩვენს უკან ქართველი ერის უმრავლესობა დგას. ასე რომ, ეს გაითვალისწინეთ. მე მესმის თქვენი შეშფოთება და აღშფოთება, რომ თქვენი აგენტურა ბარიერს ვერ გადალახავს, მაგრამ ეს წინასაარჩევნო კამპანიაში ჩართვის უფლებას არ გაძლევთ“, - განაცხადა ირაკლი ზარქუამ.ცნობისთვის, საქართველოში ევროკავშირის ელჩის პაველ ჰერჩინსკის განცხადებით, ევროკავშირის სტრუქტურებისა და წევრი ქვეყნების გადაწყვეტილებებით, ამჟამად საქართველოში ყველა მაღალი დონის ვიზიტი და საქართველოს ხელისუფლების წარმომადგენლებთან ყველა მაღალი დონის შეხვედრა შეჩერებულია. მისი თქმით, აღნიშნული გადაწყვეტილება ევროკავშირმა და წევრმა ქვეყნებმა ანტიდასავლური და ანტიევროპული ნარატივის, პროპაგანდისა და კონსპირაციის თეორიის საპასუხოდ მიიღო. ელჩის თქმით, თუ საქართველო გახდება ერთპარტიული სახელმწიფო, გახდება ქვეყანა, რომელშიც პოლიტიკური ოპოზიცია აკრძალულია, ის ვერ გახდება ევროკავშირის წევრი ვერც დღეს, ვერც ხვალ და ვერც ზეგ. ასევე, მისი განცხადებით, ბევრი დრო გაიფლანგა, საქართველოს გაწევრიანების პროცესი შეჩერდა, მოლდოვისა და უკრაინისგან განსხვავებით, რომლებიც სწრაფად მიიწევენ წინ. ელჩის მოწოდებით, ერთი წუთიც აღარ უნდა დაიკარგოს და უნდა განახლდეს საქართველოს გზა ევროკავშირში გაწევრიანებისკენ. შესაბამისად, ევროკავშირის ელჩმა საქართველოს მოსახლეობას მოუწოდა არჩევნებზე მაქსიმალური აქტივობა დააფიქსირონ, რადგან ქვეყნის ბედი ახლა მათ ხელშია. პაველ ჰერჩინსკიმ იმედი გამოთქვა, რომ არჩევნები იქნება თავისუფალი და სამართლიანი და აღნიშნა, რომ თუ არჩევნები არ ჩატარდება საუკეთესო საერთაშორისო სტანდარტების შესაბამისად, მზად იქნებიან უპასუხონ მოვლენების ნებისმიერ განვითარებას, მათ შორის ყველაზე უარეს სცენარს - საარჩევნო ძალადობას და არჩევნების შესაძლო გაყალბებას. პაველ ჰერჩინსკი საარჩევნო კამპანიას და კერძოდ კამპანიაში განადგურებული უკრაინის კადრების გამოყენებასაც გამოეხმაურა და აღნიშნულ ფაქტს აღმაშფოთებელი, სამარცხვინო და ამაზრზენი უწოდა.

სახალხო დამცველი მოუწოდებს ცენტრალურ საარჩევნო კომისიას, ოკუპირებულ ტერიტორიებზე რეგისტრირებულ საქართველოს მოქალაქეებს მიეცეს არჩევნებში მონაწილეობის შესაძლებლობა, - ამის შესახებ ინფორმაციას ომბუდსმენის აპარატი ავრცელებს.როგორც ინფორმაციაშია აღნიშნული, ბოლო დღეებში საქართველოს სახალხო დამცველისთვის ცნობილი გახდა ისეთი შემთხვევების შესახებ, როდესაც ოკუპირებულ ტერიტორიებზე რეგისტრირებულ საქართველოს იმ მოქალაქეებს, რომლებიც საზღვარგარეთ იმყოფებიან, თუმცა დევნილთა მონაცემთა ბაზაში არ აქვთ მითითებული საქართველოში ფაქტობრივი საცხოვრებელი ადგილი, არ ეძლევათ ერთიან საარჩევნო სიაში მათი მონაცემების ასახვის და შესაბამისად, არჩევნებში მონაწილეობის შესაძლებლობა.„ასევე ვრცელდება ინფორმაცია, რომ არჩევნებში მონაწილეობის მისაღებად აფხაზეთიდან დევნილ საქართველოს მოქალაქეებს სთხოვენ რეგისტრაციის ადგილის შეცვლას, რაც ნიშნავს, რომ საქართველოს ოკუპირებულ ტერიტორიაზე არსებული მათი მისამართი აღარ იქნება მითითებული მათი რეგისტრაციის ადგილად.საკითხის მოკვლევის შედეგად, სახალხო დამცველს მიაჩნია, რომ ოკუპირებული ტერიტორიებიდან იძულებით გადაადგილებული პირისთვის მუდმივი საცხოვრებელი ადგილის ოკუპირებულ ტერიტორიაზე შენარჩუნებას აქვს როგორც უფლებრივი, სამართლებრივი, ასევე, პოლიტიკური დატვირთვა, შესაბამისად, ასეთ პირებს არ სურთ მუდმივი საცხოვრებელი მისამართის შეცვლა. ამავე დროს სახალხო დამცველი ხაზგასმით აღნიშნავს, რომ რეგისტრაციის ტექნიკური საკითხი არ უნდა გახდეს მათთვის კონსტიტუციით გარანტირებული არჩევნებში მონაწილეობის უფლების შეზღუდვის საფუძველი, მითუმეტეს როცა ეს არჩევნები არის საერთო სახელმწიფოებრივი და არა ადგილობრივი თვითმმართველობის. შესაბამისად საქართველოს ცენტრალურ საარჩევნო კომისიას მოუწოდებს მისი დისკრეციული უფლებამოსილების ფარგლებში, ადამიანის უფლებების დაფუძნებული მიდგომის და ნორმათა სისტემური განმარტების საფუძველზე, გამოიყენოს მის ხელთ არსებული ყველა შესაძლებლობა და შეიყვანოს ასეთი პირების მონაცემები ერთიან საარჩევნო სიაში“, - ნათქვამია ინფორმაციაში.

საქართველოში საფრანგეთის საელჩო ელისეის სასახლეში სალომე ზურაბიშვილისა და ემანუელ მაკრონის შეხვედრასთან დაკავშირებით ინფორმაციას ავრცელებს.როგორც ინფორმაციაშია ნათქვამი, საფრანგეთის პრეზიდენტმა „აღნიშნა ნეგატიური მოვლენები, რომლებიც ამ ბოლო თვეების განმავლობაში საქართველოში მოხდა. კერძოდ, მან სინანული გამოთქვა იმ კანონების მიღების გამო, რომლებმაც ქვეყანას ევროპული ტრაექტორიიდან გადაახვევინეს და გაწევრიანების პროცესის ფაქტობრივი შეჩერება გამოიწვიეს“.რაც შეეხება 26 ოქტომბრის არჩევნებს, საელჩოს ცნობით, ემანუელ მაკრონმა იმედი გამოთქვა, რომ ეს არჩევნები საერთაშორისო სტანდარტების შესაბამისად ჩატარდება და საქართველოს საშუალებას მისცემს, ევროპულ გზას დაუბრუნდეს.„რესპუბლიკის პრეზიდენტი უპირველეს ყოვლისა, ქართველი ხალხის ევროპულ და დემოკრატიულ მისწრაფებებს მიესალმა, რის გამოც ევროკავშირმა 2023 წლის დეკემბერში, საქართველოს კანდიდატი ქვეყნის სტატუსი მიანიჭა. მიუხედავად ამისა, მან აღნიშნა ნეგატიური მოვლენები, რომლებიც ამ ბოლო თვეების განმავლობაში საქართველოში მოხდა. კერძოდ, მან სინანული გამოთქვა იმ კანონების მიღების გამო, რომლებმაც ქვეყანას ევროპული ტრაექტორიიდან გადაახვევინეს და გაწევრიანების პროცესის ფაქტობრივი შეჩერება გამოიწვიეს, როგორც ეს ევროპულმა საბჭომ გასულ ივნისში დაადასტურა.

საქართველოში ამერიკის შეერთებული შტატების საელჩო სოციალურ ქსელში მორიგ „ქარდს“ აქვეყნებს.აშშ-ს საელჩო ამჟამად წერს: „დემოკრატები ოპოზიციას არ კრძალავენ“.„დემოკრატები ოპოზიციას არ კრძალავენ“,- ნათქვამია საელჩოს განცხადებაში.ცნობისთვის, უკვე რამდენიმე დღეა საქართველოში ამერიკის შეერთებული შტატების საელჩო სოციალურ ქსელში პოსტებითა და "ქარდებით" ქვეყნის ხელისუფლების მიერ გატარებულ პოლიტიკასა და ქართველი მაღალჩინოსნების მიერ გაჟღერებულ მთავარ გზავნილებს ეხმაურება. გზავნილებს შორის, რომლის საპასუხოდაც აშშ-ის საელჩომ პოსტები უკვე გაავრცელა, საქართველოში მეორე ფრონტის გახსნისა და "ქართული ოცნების" დამფუძნებლის ბიძინა ივანიშვილის "კრედიტ სუისთან" ურთიერთობის საკითხები იყო. ასევე, ამერიკის შეერთებული შტატების საელჩომ, 3 ოქტომბერსაც გამოაქვეყნა ქარდი, წარწერით: „იზოლაციაში ქვეყანა ვერ ვითარდება. საქართველოს დასავლეთისგან იზოლაცია მისი ხალხის ინტერესებს ეწინააღმდეგება“.

“ქართული ოცნება” ისეთ ნაბიჯებს დგამს, არჩევნების გაყალბების კომპლექსური პროცესი მიდის უკვე. არჩევნები არ ყალბდება არჩევნების დღეს, მითუმეტეს ასეთი ხელისუფლების პირობებში, - ამის შესახებ პარტია “გახარია საქართველოსთვის” თავმჯდომარის მოადგილემ ნათია მეზვრიშვილმა "პალიტრანიუსის" გადაცემა “თავისუფალ სტუდიაში” განაცხადა.მეზვრიშვილმა ისაუბრა წინასაარჩევნო ვითარებაზე ქვეყანაში და ყურადღება გაამახვილა იმ „მწვავე განცხადებებზე“, რომელიც საერთაშორისო პარტნიორებისგან ისმის ინტენსიურად.ამ კონტექსტში მან ისაუბრა PACE-ის წევრების დეკლარაციაზე, რომელშიც ნათქვამია, რომ „საგანგაშო ცნობები საქართველოდან აჩვენებს თუ როგორ ემზადება მმართველი პარტია მომავალი საპარლამენტო არჩევნების მოპარვისთვის“.“არჩევნებამდე დარჩენილია რამდენიმე კვირა და ჩვენ უკვე გვესმის ძალიან მწვავე განცხადებები საერთაშორისო პარტნიორებისგან, მითუმეტეს, ეს არის სადამკვირვებლო ფუნქციის მატარებელი ორგანიზაცია, რომელიც რამდენიმე დღის წინ ოფიციალური ვიზიტით იმყოფებოდა საქართველოში და ზუსტად მათ ვიზიტს დაამთხვია ირაკლი კობახიძემ ანტიკორუფციული ბიუროს გადაწყვეტილება, რომელიც, ყველამ ცხადად ნახა, რომ მიიღო კობახიძემ და არა ანტიკორუფციული ბიუროს უფროსმა და რომლითაც ერთ-ერთ ყველაზე მსხვილ არასამთავრობო ორგანიზაციას სადამკვირვებლო ფუნქციით - “საერთაშორისო გამჭვირვალობა - საქართველოს” თავს დაესხნენ და მას, ფაქტობრივად, აუკრძალეს დაკვირვება.“ქართული ოცნება” ისეთ ნაბიჯებს დგამს, არჩევნების გაყალბების კომპლექსური პროცესი მიდის უკვე. არჩევნები არ ყალბდება არჩევნების დღეს, მითუმეტეს ასეთი ხელისუფლების პირობებში. მასშტაბური სისტემური კორუფცია, რომლითაც პარტიის შავი სალარო ივსება და რაზეც პასუხისმგებლობა პირდაპირ აქვს აღებული კობახიძეს, ზეწოლები მუქარები - ეს ყველაფერი ახლა მიმდინარეობს.გუშინ მატყუარა პრემიერი გამოვიდა და თქვა, რომ უპრეცედენტოდ მშვიდი საარჩევნო გარემო არისო, დღეს დილით კი ჩვენი გუნდის წევრი უკვე მეორედ შეავიწროვეს, მეორედ განახორციელეს მასზე იძულება, ერთ ადამიანზე, რომელიც აგვისტოს ბოლოს ჯერ სკოლის დირექტორის თანამდებობიდან მოხსნეს გიორგი გახარიას მხარდაჭერის გამო და ახლა უკვე რიგით მასწავლებლად მუშაობდა იმავე სკოლაში და უნდათ, აიძულონ და დაატოვებინონ სამსახური, სკოლა, რომელსაც ათეულობით წლებია ემსახურება”, - განაცხადა მეზვრიშვილმა.მისივე შეფასებით, “ქართულ ოცნებაში” გაურკვევლობის ხარისხი იმდენად მაღალია, რომ პანიკაში არიან. როგორც მეზვრიშვილმა აღნიშნა, ხელისუფლებას არანაირი პოლიტიკური სტრატეგია დღეის მდგომარეობით არ გააჩნია. მისი თქმით, ერთადერთი, რაც ჩანს, არის შიში, მარცხის გააზრების ძალიან მტკივნეული პროცესი.“ქართულ ოცნებაში” არის გაურკვევლობის ძალიან მაღალი ხარისხი. შემთხვევითი არ იყო, რომ მათ 1-ლი ოქტომბერი საერთოდ არ აღნიშნეს, შემთხვევითი არ იყო, რომ ღონისძიება, რომელიც დაგეგმილი ჰქონდათ, გადადეს, შემთხვევითი არ იყო, რომ კობახიძე დამალეს, მან საერთოდ თავი წაიქცია, მოატყუა საზოგადოება, მერე შეიკეტა და წერდა ანტიკორუფციული ბიუროს გადაწყვეტილებას. შემთხვევითი არ იყო ის განცხადებები, რაც მან ირაკლი ღარიბაშვილზე გააკეთა, დღეს მამუკა მდინარაძემ, ფაქტობრივად, დასცინა კობახიძეს. შიგნით რაღაცას ვერ იყოფენ, სიით არიან უკმაყოფილოები, არ იციან, ხვალ და ზეგ ბიძინა ივანიშვილი რას იზამს იმიტომ, რომ თვითონ ივანიშვილმა არ იცის, რა ნაბიჯები გადადგას და არანაირი პოლიტიკური სტრატეგია დღეის მდგომარეობით არ გააჩნიათ. ერთადერთი, რაც ჩანს, არის შიში, მარცხის გააზრების ძალიან მტკივნეული პროცესი. თითქოს ამით იყო გამოწვეული გუშინდელი უკან დახევა.საქართველოს მოქალაქეებს დასცინეს გუშინ. კობახიძეს მორალური უფლება აღარ აქვს, რომ საერთოდ კონსტიტუციონალისტობაზე გველაპარაკოს. რომელ კონსტიტუციაში ჯდება ის, რომ საკუთარ ქვეყანას ომის დაწყებაში ადანაშაულებ. კონსტიტუციის რომელი პრინციპია, რომ პოლიტიკური მიზანშეწონილობით კანონში რაც არ წერია, ის გააკეთებინო ფსევდო-დამოუკიდებელ უწყებას, ის, რაც გუშინ გააკეთა ანტიკორუფციულ ბიუროსთან მიმართებაში.პანიკაში არიან, არ იციან რა ხდება, არც ის იციან, ბიძინა ივანიშვილს რა ბედი ელის, უფრო მეტიც - კობახიძემ თავად არ იცის, რა ბედი ელის მას. ეს გაურკვევლობის ხარისხი იმდენად მაღალია, რომ არიან პანიკაში”, - განაცხადა მეზვრიშვილმა.

დაველოდოთ მოვლენებს, არჩევნებს თუ გააყალბებენ, მოხვდებათ ცხვირში. რამდენად თავხედურადაც გააყალბებენ, იმდენად მწარედ მოხვდებათ ცხვირში, - ამის შესახებ „ერთიანობა - ნაციონალური მოძრაობის“ გენერალურმა მდივანმა, პეტრე ცისკარიშვილმა „პალიტრანიუსის“ გადაცემა „თავისუფალ სტუდიაში“ განაცხადა.პეტრე ცისკარიშვილის თქმით, ხელისუფლება არჩევნებს ვერ „მოიპარავს“, რადგან ოპოზიცია იქნება გაცილებით უფრო ორგანიზებული.„არავის არ შერჩენია არჩევნების მოპარვა. საზოგადოებისთვის არჩევანის წართმევა. შეიძლება ზოგიერთ ქვეყანაში შერჩათ, მაგალითად როგორიც არის ბელარუსი, მაგრამ იქ პრაქტიკულად პოლიტიკური ორგანიზაციები, პარტიები არც კი არსებობდნენ, რუსეთი ჩამოიყვანა, პუტინი დაიხმარა და გადაირჩინა თავი ლუკაშენკომ, მაგრამ აქ ვერც პუტინს ჩამოიყვანენ და ვერც თავს გადაირჩენენ იმიტომ, რომ გაცილებით უფრო ორგანიზებული ვიქნებით და არავის არ მოვაპარვინებთ იმ არჩევნებს, რომლის მიტაცებასაც ცდილობენ.მოქმედების გეგმას ნახავთ მას შემდეგ, რაც დადასტურდება არჩევნების მოპარვის მცდელობა. შემდეგ იქნება გეგმაც და მოქმედებაც. არაფერი გეგმა მაგას არ უნდა, პირდაპირ უნდა გადავიდეთ მოქმედებაზე. მათ შორის ქუჩაც, აბა, სახლებში ხომ არ დავსხდებით, ვუყურებთ და დაველოდებით, იქნებ და კალანდარიშვილი გასხივოსნდეს, აზრი შეიცვალოს და რეალური ციფრები დაწეროს. ვერ დაველოდებით, უნდა ვიმოქმედოთ“, - განაცხადა პეტრე ცისკარიშვილმა.მისი თქმით, „ქართულმა ოცნებამ“ საქართველოს ვექტორი ნელ-ნელა ჩრდილოეთისკენ შეაბრუნა, რასაც „რევოლუციურ შემობრუნება სჭირდება“.„ჩვენ ვემზადებით რევოლუციისთვის ეკონომიკაში, სოციალურ სფეროში, ჯანდაცვაში, განათლებაში და რევოლუციისთვის ვექტორის შემოსაბრუნებლად. მთავარია, რომ ვექტორი ნელ-ნელა ჩრდილოეთისკენ შეაბრუნა „ქართულმა ოცნებამ“ იმიტომ, რომ ასე აწყობთ გეოპოლიტიკურად, ღირებულებებით, ფასეულობებით, სამეგობროთი. ხედავენ, რომ რუსეთის ორბიტაზე მყოფი ქვეყნები ხელისუფლებას ინარჩუნებენ ათწლეულობით, შეიძლება დინასტიებითაც კი გადასცენ ოჯახის წევრებს. ეს ძალიან მოსწონთ და ამ ღირებულებებს ცდილობენ, რომ შეაჩვიონ ქართველი ხალხი, რასაც ნამდვილად ვერ შეძლებენ. ამას სჭირდება რევოლუციური შემობრუნება და წასვლა დემოკრატიისკენ და ევროპისკენ, ევროკავშირისკენ“, - განაცხადა პეტრე ცისკარიშვილმა.რაც შეეხება საქართველოში აშშ-ის საელჩოს მიერ სოციალურ ქსელში გამოქვეყნებულ განცხადებებს, პეტრე ცისკარიშვილის თქმით, ამით აშშ-ის საელჩო სიმართლეს ეუბნება ქართველ ამომრჩეველსაც და ამერიკელ ხალხსაც.„ძალიან პრაგმატული გათვლა აქვთ და საქმიანად უყურებენ ყველაფერს ჩვენი ამერიკელი კოლეგები. მათთვის საქართველო არის მეგობარი ქვეყანა, სტრატეგიული პარტნიორი სამხრეთ კავკასიაში, რომელსაც ეყრდნობოდნენ ბოლო 30 წლის განმავლობაში. ჯერ კიდევ 2009 წელს დაიწყო საუბარი თავისუფალ ვაჭრობაზე და უვიზო მიმოსვლაზე აშშ-სა და საქართველოს შორის. „ქოციანობა“ რომ არ დამდგარიყო, გვჯერა, რომ უვიზო მიმოსვლა უკვე გვექნებოდა.ახლა ისინი უყურებენ რეალობას, რომ მეგობარი ფაქტობრივად ხელიდან ეცლებათ იმიტომ, რომ ხალხი არის მათ მხარეს, ევროატლანტიკური ინტეგრაციის მხარეს, მაგრამ თავზე მოაჯდა მმართველი კლანი, ჯგუფი რუსი ოლიგარქის ხელმძღვანელობით, რომელიც ქვეყანას მეორე მიმართულებით ექაჩება, ხოლო ამერიკას ლანძღავს, აგინებს და გლობალური ომის პარტიას უწოდებს და თავი არ დაიცვან? როგორც მინიმუმ სიტყვით ეუბნებიან სიმართლეს ამომრჩეველსაც, საკუთარ ხალხსაც ამერიკაში“, - განაცხადა პეტრე ცისკარიშვილმა.

დარწმუნებული ვარ, რომ ქართველი ერი სწორ არჩევანს გააკეთებს. ამის შესახებ რუსეთის საგარეო დაზვერვის სამსახურის დირექტორმა, სერგეი ნარიშკინმა ბაქოში ჟურნალისტებთან საუბარში განაცხადა.ნარიშკინის თქმით, ეუთო/ოდირმა “აშშ-ის სახელმწიფო დეპარტამენტის დაკვეთით” მოამზადა “შუალედური დასკვნა, რომელშიც არსებობს თეზისი იმის შესახებ, თითქოს საქართველოში სამართლიანი და ღია არჩევნებისთვის პირობები არ არსებობს”. ნარიშკინის თქმით, ეს “რა თქმა უნდა, რეალობას არ შეესაბამება”.“ამ აქციის მიზანია - სცადოს უხეშად, საკმაოდ თავხედურად ჩაერიოს საქართველოს შიდა საქმეებში, სცადოს კვლავ არ დაუშვას მმართველობისადმი ჯანსაღი, ეროვნულად ორიენტირებული ძალები. მაგრამ, დარწმუნებული ვარ, რომ ქართველი ერი აირჩევს. გააკეთებს სწორ და ზუსტ არჩევანს”, - განაცხადა ნარიშკინმა.

საფრანგეთის პრეზიდენტი, ემანუელ მაკრონი საქართველოს პრეზიდენტთან, სალომე ზურაბიშვილთან შეხვედრას სოციალურ ქსელში ეხმაურება და აცხადებს, რომ საფრანგეთს იმედი აქვს, 26 ოქტომბრის არჩევნები საშუალებას მისცემს საქართველოს, ევროპულ გზას დაუბრუნდეს.„ძვირფასო სალომე, მოხარული ვარ, რომ გიმასპინძლეთ პარიზში! საფრანგეთი მიესალმება ქართველი ხალხის ევროპულ და დემოკრატიულ მისწრაფებებს. იგი იმედოვნებს, რომ 26 ოქტომბრის არჩევნები საშუალებას მისცემს საქართველოს ევროპულ გზას დაუბრუნდეს“, - წერს მაკრონი „ფეისბუქში“.შეგახსენებთ, საქართველოს პრეზიდენტი, სალომე ზურაბიშვილი ფრანგ კოლეგას გუშინ შეხვდა.'

მოვუწოდებთ საქართველოს ხელისუფლებას, გადახედოს „ოჯახური ღირებულებებისა და არასრულწლოვანთა დაცვის შესახებ“ კანონთა პაკეტს, რომელიც “უცხოური გავლენის გამჭვირვალობის შესახებ” კანონთან ერთად, ზღუდავს როგორც სამოქალაქო საზოგადოებას, ისე ცალკეულ საქართველოს მოქალაქეების უფლებებს, - ამის შესახებ განცხადება ბრიტანეთის ელჩმა საქართველოში გარეტ უორდიმ გააკეთა, რასაც საელჩო სოციალურ ქსელში ავრცელებს.ელჩი შეშფოთებულია, რომ კანონი მოკლე დროში იქნა მიღებული და მიიჩნევს, რომ ის ძირს უთხრის ადამიანის ფუნდამენტურ უფლებებს.“ვწუხვართ, რომ ხელი მოეწერა "ოჯახური ღირებულებებისა და არასრულწლოვანთა დაცვის შესახებ" კანონთა პაკეტს. ეს კანონთა პაკეტი ძირს უთხრის ადამიანის ფუნდამენტურ უფლებებს, მათ შორის გამოხატვისა და შეკრების თავისუფლებას და რისკის შემცველია საქართველოს ყველა მოქალაქისთვის.ის ხელს შეუწყობს ისედაც მოწყვლადი ჯგუფების მიმართ კიდევ უფრო მეტ დისკრიმინაციას და მარგინალიზაციას.შეშფოთებულები ვართ, რომ კანონთა პაკეტი მიღებულ იქნა ასეთ მოკლე დროში.კიდევ ერთხელ მოვუწოდებთ საქართველოს ხელისუფლებას, გადახედოს „ოჯახური ღირებულებებისა და არასრულწლოვანთა დაცვის შესახებ“ კანონთა პაკეტს, რომელიც “უცხოური გავლენის გამჭვირვალობის შესახებ” კანონთან ერთად, ზღუდავს როგორც სამოქალაქო საზოგადოებას, ისე ცალკეულ საქართველოს მოქალაქეების უფლებებს და ეჭვქვეშ აყენებს ბრიტანეთსა და საქართველოს შორის მრავალწლიან ურთიერთობას”, - განაცხადა ელჩმა.„ოჯახური ღირებულებებისა და არასრულწლოვანის დაცვის შესახებ“ კანონს ხელი პარლამენტის თავმჯდომარემ , შალვა პაპუაშვილმა მოაწერა. როგორც მან სოციალურ ქსელში გამოქვეყნებულ განცხადებაში აღნიშნა, დღეს, საქართველოს კონსტიტუციის თანახმად, ხელს აწერს „ოჯახური ღირებულებებისა და არასრულწლოვანის დაცვის შესახებ" კანონს, რომელსაც ხელი არ მოაწერა სალომე ზურაბიშვილმა.„ჩემთვის ამ კანონზე ხელის მოწერა, არის ყველაზე დიდი ლეგიტიმაციის მქონე ხელმოწერა. ხელმოწერა, რომლის უკან დგას ერიც და ბერიც“, - დაწერა პაპუაშვილმა „ფეისბუქზე“.

ე ხალხს მინდა, ვუთხრა, არანაირი პრობლემა არ არის, თუ დაგვასანქცირებენ , - ამის შესახებ დედაქალაქის მერმა კახა კალაძემ ჟურნალისტებთან განაცხადა.მისი თქმით, საქართველოს ხელისუფლება არაფერს აკეთებს და არაფერი გაუკეთებია იმისთვის, რომ სანქციები დაადონ.როგორც კალაძემ აღნიშნა, დემოკრატიულობისა და ევროპელობის ლოგიკას თავადვე ეწინააღმდეგებიან მათ წინააღმდეგ გაჟღერებული აბსურდული განცხადებებით.“იმაზე დიდი სანქცია რა არის, ადამიანს ყველანაირი სასამართლო მოგებული აქვს და პოლიტიკური მოტივით ექცევიან უსამართლოდ - არ უბრუნებენ მის თანხებს.მცდელობა აქვთ, რომ ხალხი დაზაფრონ. მე ხალხს მინდა, ვუთხრა, არანაირი პრობლემა არ არის, თუ დაგვასანქცირებენ. ჯერ წარმოუდგენელია, რატომ უნდა დაგვასანქცირონ? რას აკეთებს საქართველოს ხელისუფლება ან რა გააკეთა, რომ სანქციების ქვეშ მოვექცეთ, წარმოუდგენელია. ვაკეთებთ ორად ორ რამეს - ვიცავთ ჩვენს ქვეყანას, ქვეყანაში არ გავხსენით მეორე ფრონტი და არ შევუერთდით სანქციებს და ამის გამო თუ ვინმეს სურვილი აქვს, რომ მოგვექცეს უსამართლოდ და დაგვსაჯოს, კი ბატონო.ზოგადად, დემოკრატიულობისა და ევროპელობის ლოგიკას თავადვე ეწინააღმდეგებიან ამ აბსურდული განცხადებებით, თორემ როგორ შეიძლება ანტიდემოკრატიული იყოს გამჭვირვალობის კანონი”, - განაცხადა კალაძემ.

რა ფასი აქვს ასეთ განცხადებას, როცა არის სავსე ტყუილებითა და სიცრუით , - ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებთან ევროპის საბჭოს საპარლამენტო ასამბლეის მიერ გავრცელებულ დეკლარაციასთან დაკავშირებით განაცხადა.მისი თქმით, დოკუმენტს მხოლოდ 24 დეპუტატი აწერს ხელს.“ერთი, რომ 24-მა დეპუტატმა მოაწერა ხელი ამ დოკუმენტს, 24-იც რომ არ ყოფილიყო და რომ ყოფილიყო თუნდაც 240 ან 600, რა ფასი აქვს ასეთ განცხადებას, როცა არის სავსე ტყუილებითა და სიცრუით. არჩევნებამდე მხოლოდ 3 კვირა არის დარჩენილი და უპრეცედენტოდ მშვიდ გარემოში მიმდინარეობს წინასაარჩევნო პროცესი”, - განაცხადა კობახიძემ.ევროპის საბჭოს საპარლამენტო ასამბლეის (PACE) დეკლარაციაში - “არჩევნები საქართველოში - საგანგაშო მოვლენები”, რომელსაც 24 წევრი აწერს ხელს, ნათქვამია, რომ “საგანგაშო ცნობები მოდის საქართველოდან, რომლებიც აჩვენებს თუ როგორ ემზადება მმართველი პარტია მომავალი საპარლამენტო არჩევნების მოპარვისთვის.დეკლარაციის თანახმად, არჩევნების შედეგების საერთაშორისო აღიარების მისაღწევად საქართველოს ოფიციალურმა პირებმა უნდა შეწყვიტონ ანტიდემოკრატიული ქმედებები და შეცვალონ კურსი.

ძნელი სათქმელია ისინი იძლევიან განკარგულებებს, თუ მმართველი პარტია საკუთარი ინიციატივით ცდილობს რუსების სიამოვნებას, მაგრამ ამას ნამდვილად არ აქვს მნიშვნელობა, - ამის შესახებ საქართველოს პრეზიდენტმა, სალომე ზურაბიშვილმა The Kyiv Independent-თან ინტერვიუში განაცხადა, როდესაც დაუსვეს შეკითხვა, როგორ ფიქრობს, ახლა თბილისში მოსკოვი გასცემს თუ არა განკარგულებებს.„ეს ისაა, რასაც გარედან ვერ გაიგებ. მნიშვნელოვანია ეს პარალელი, ეს მსგავსება, რომელიც ბევრს მეტყველებს იმაზე, თუ რა მიმართულებით მიდის მმართველი პარტია და რომელიც დარწმუნებული ვარ, არჩევნებზე დაძლეული იქნება, რადგან ეს ის არ შეიძლება იყოს, რაც ქართველ ხალხს, რომელსაც ორი ოკუპირებული ტერიტორია აქვს, შეიძლება თავისი მომავლისთვის უნდოდეს“, - აღნიშნა საქართველოს პრეზიდენტმა.ამასთან, კითხვაზე, რას ფიქრობს ბიძინა ივანიშვილის განცხადებაზე, რომ საქართველოა დამნაშავე 2008 წლის ომში და ბოდიში უნდა მოიხადოს, საქართველოს პრეზიდენტმა უპასუხა:„ეს ერთი განცხადება არაა, ეს ბოლოდროინდელი განცხადებების და რიტორიკის ნაკრებია, რომელიც ერთი მიმართულებით მიდის. როგორც ვთქვი, რუსეთის სასიამოვნოდ და ჩვენს მეგობრებსა და პარტნიორებზე თავდასხმისთვის. ასე რომ, ესაა ზოგადი სურათი, რომელიც საქართველოში ძალიან აწუხებთ და რომელსაც საქართველოს მოსახლეობა ხედავს და არ ესმის და დარწმუნებული ვარ, არ იზიარებს“, - აღნიშნა პრეზიდენტმა.