რასა იუკნევიჩიანე - ევროპისა და კრემლის მომხრე ერთდროულად ვერ იქნები - ის, რასაც ბიძინა ივანიშვილი 2008 წლის ომზე ამბობს, რასაც ის და სხვა ოფიციალური პირები ევროპარლამენტის შესახებ ამბობენ, კრემლის ნარატივია

დედაქალაქის მერი კახა კალაძე საპარლამენტო არჩევნებში ოპოზიციის დამარცხებას ვარაუდობს და აცხადებს, რომ ოპონენტებს გამარჯვების არანაირი შესაძლებლობა არ გააჩნიათ.მისივე მოსაზრებით, საქართველოს პრეზიდენტის ოპოზიციასთან თანამშრომლობას არავითარი მნიშვნელობა არ აქვს.„ამ ოპოზიციას, გინდ შეერთებულს, გინდ დაშლილს, გინდ სალომესთან ერთად, გინდ მის გარეშე, გინდ შალიკოს ფანჩატურით, გინდ მის გარეშე, აქვს ნულის ტოლფასი შანსი. არანაირი შესაძლებლობები არ გააჩნიათ, ეს არის რეალობა. თქვენ თუ გინდათ ამ რეალობის დამახინჯება, საზოგადოებისთვის სხვანაირად მიწოდება, ეს თქვენი საქმეა, შეგიძლიათ გააგრძელოთ, მაგრამ დღევანდელ რეალობაში „ქართულ ოცნებას“ აქვს იმის შესაძლებლობა, რომ გაიმარჯვოს საკონსტიტუციო უმრავლესობით.სალომე ზურაბიშვილმა თქვა, რომ აკეთებს შტაბს. მე ამას მივესალმები, რადგან ის ადამიანები ჩვენთან ერთად იზეიმებენ „ქართული ოცნების“ გამარჯვებას და საკონსტიტუციო უმრავლესობით მოსვლას ხელისუფლებაში. დღევანდელ მოცემულობაში შეუძლებელია, რადიკალიზმმა, ბოროტებამ რაიმე წარმატებას მიაღწიოს“, - განაცხადა კახა კალაძემ.

უკრაინას ან ბირთვული იარაღი ექნება, ან ჩვენ ნატო-ს წევრი ვიქნებით, - უკრაინის პრეზიდენტის, ვოლოდიმირ ზელენსკის თქმით, ამის შესახებ მან აშშ-ის ყოფილ პრეზიდენტთან, დონალდ ტრამპთან შეხვედრაზე განაცხადა.„დიდი ქვეყნებიდან, ბირთვული სახელმწიფოებიდან რომელი დაზარალდა? არცერთი. მხოლოდ ერთი - უკრაინა. ვინ დათმო ბირთვული იარაღი? ყველამ? ერთმა - უკრაინამ. ვინ იბრძვის დღეს? უკრაინა. დონალდ ტრამპთან საუბრისას მას ვუთხარი: რა არის გამოსავალი? ან უკრაინას ბირთვული იარაღი ექნება და ეს ჩვენთვის დაცვა იქნება, ან რაიმე სახის ალიანსი უნდა გვქონდეს. ნატო-ს გარდა ჩვენ სხვა ეფექტური ალიანსები არ ვიცით“, - განაცხადა უკრაინის პრეზიდენტმა, ბრიუსელში, ევროპული საბჭოს სამიტზე მონაწილეობის შემდეგ გამართულ პრესკონფერენციაზე.ვოლოდიმირ ზელენსკიმ აღნიშნა, რომ დღეს ნატო-ს ქვეყნები არ იბრძვიან, სწორედ ამიტომ, უკრაინა ნატო-ს ირჩევს და არა ბირთვულ იარაღს.„მჯერა, დონალდ ტრამპმა მომისმინა, მან თქვა: „თქვენ სამართლიანი არგუმენტები გაქვთ“, - აღნიშნა ვოლოდიმირ ზელენსკიმ.

გამჭვირვალობის რეესტრში დღეისთვის რეგისტრირებულ ორგანიზაციათა რიცხვმა უკვე გადააჭარბა იმ ორგანიზაციების რიცხვს, რომლებიც „უცხოური გავლენის გამჭვირვალობის“ კანონს ასაჩივრებენ, - ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.მისი თქმით, დამატებით 300-ზე მეტი ორგანიზაციის სარეგისტრაციო განაცხადი ჯერ ისევ დამუშავების პროცესშია.„გამჭვირვალობის რეესტრში დღეისთვის რეგისტრირებულ ორგანიზაციათა რიცხვმა (144 ორგანიზაცია) უკვე გადააჭარბა იმ ორგანიზაციების რიცხვს, რომლებიც „უცხოური გავლენის გამჭვირვალობის“ კანონს ასაჩივრებენ (136 ორგანიზაცია). დამატებით 300-ზე მეტი ორგანიზაციის სარეგისტრაციო განაცხადი ჯერ ისევ დამუშავების პროცესშია....და, თქვენ წარმოიდგინეთ, ყოველ დილით ისევ საქართველოს ლამაზ ქალაქებსა და სოფლებში ვიღვიძებთ,“ - წერს პაპუაშვილი.

ჩვენთვის ახალი არ არის ის რიტორიკა, რომელიც ბოლო დღეების განმავლობაში გვესმის, სამწუხაროდ, ხშირ შემთხვევაში, სუბიექტურად ხდება პროცესების შეფასება, რომელიც, რა თქმა უნდა, არ არის კარგი, რადგან ვართ საარჩევნო პროცესში და ამ შემთხვევაში, ვფიქრობ, ყველაზე უფრო მეტი პასუხისმგებლობა მოეთხოვება ყველა ჩვენს პარტნიორ და მეგობარ ქვეყანას, იმიტომ, რომ მაქსიმალურად ტრანსფარენტული და ობიექტური იყოს ჩვენი საარჩევნო პროცესი, - ასე შეაფასა ლევან დავითაშვილმა ლიეტუვის პრეზიდენტის განცხადება.პირველი ვიცე-პრემიერის თქმით, სხვა შეფასება, ამ ეტაპზე, ზედმეტია.„არჩევნების ჩატარებამდე დაგვრჩა ათ დღეზე ნაკლები დრო, შესაბამისად, მოსახლეობას უნდა მივცეთ საშუალება, ობიექტურად, ზეწოლის გარეშე მიიღონ არჩევნებში მონაწილეობა და სწორი არჩევანი გააკეთონ “, - განაცხადა ლევან დავითაშვილმა.ცნობისთვის, ლიეტუვის პრეზიდენტმა, გიტანას ნაუსედამ ბრიუსელში ევროპული საბჭოს სხდომის დაწყებამდე ჟურნალისტებს განუცხადა, რომ საქართველოში კრიტიკულად მნიშვნელოვანი არჩევნები გაიმართება.„საქართველოში გაიმართება კრიტიკულად მნიშვნელოვანი არჩევნები, რადგან ქართველი ხალხი გადაწყვეტილებას მიიღებს მიმართულების შესახებაც. თუკი ისინი შეინარჩუნებენ ამჟამინდელ სტატუს-კვოს, არ ვფიქრობ, რომ საქართველო ზრუნავს შანსებზე, მიაღწიოს პროგრესს და წარმატებას ევროინტეგრაციის გზაზე“,-განაცხადა გიტანას ნაუსედამ.

ის ციტატები, რაც ამ ანგარიშიდან წამიკითხეთ, იმის ფიქრის საშუალებას მაძლევს, რომ ეს ანგარიში საქართველოზე არ არის დაწერილი - თუ საქართველოს გულისხმობდნენ, ალბათ, სააკაშვილის რეჟიმზე იყო საუბარი, - ამის შესახებ პარლამენტის ვიცე-სპიკერმა, ნინო წილოსანმა ჟურნალისტებთან აშშ-ის ჰელსინკის კომიტეტის განცხადებაზე საუბრისას განაცხადა.მისი თქმით, ჰელსინკის კომისიამ, შესაძლოა, ეს შეფასებები თავის ანგარიშში 12 წლის დაგვიანებით გააკეთა.„ის ციტატები, რაც ამ ანგარიშიდან წამიკითხეთ, იმის ფიქრის საშუალებას მაძლევს, რომ ეს ანგარიში საქართველოზე არ არის დაწერილი. მით უფრო, არ არის დაწერილი საქართველოში მიმდინარე პოლიტიკურ სიტუაციაზე. თუ საქართველოს გულისხმობდნენ, ალბათ, სააკაშვილის რეჟიმზე იყო საუბარი. სამწუხაროდ, იმ დროს თითოეული მათგანი დუმდა და ამ შეფასებებს არ იყენებდა. ამიტომ, შეიძლება 12 წლის დაგვიანებით გააკეთეს ეს შეფასებები თავის ანგარიშში, - განაცხადა წილოსანმა.ამავე თემაზე საუბრისას, წილოსანმა აღნიშნა, რომ თითოეული ასეთი განცხადება მიმართულია იმისკენ, რომ ასულდგმულონ ოპოზიციის დღის წესრიგი და წინასაარჩევნოდ რაც შეიძლება მაღლა აწიონ პოლიტიკური ტემპერატურა.„იმ ქვეყნის პოლიტიკური წარმომადგენლები, სადაც პრეზიდენტობის კანდიდატს ესვრიან და მოსაკლავად იმეტებენ, როდესაც საქართველოში პოლიტიკურ წინასაარჩევნო გარემოზე განცხადებებს აკეთებენ, ლოგიკური კითხვა მიჩნდება, მათ შემთხვევაში როგორ ფიქრობენ, როგორ მიმდინარეობს აშშ-ში საარჩევნო პროცესები? ალბათ, უფრო მეტი ძალისხმევით უნდა და კონცენტრირდნენ თავიანთ ქვეყანაში მიმდინარე პროცესებზე, იმიტომ, რომ ყველა ქვეყნის სუვერენული უფლებაა, თითოეული ქვეყნის პოლიტიკა ქვეყნის შიგნით კეთდებოდეს.სიტყვა „ავტორიტარიზმის“ გამოყენებას სხვადასხვა რეზოლუციაში თავისი დატვირთვა აქვს. წინასაარჩევნოდ განულებულ ოპოზიციას რაიმე სახის დახმარება სჭირდება. ეს დახმარება აუცილებლად უნდა იყოს გარე ფაქტორებიდან გამომდინარე, იმიტომ, რომ მათთვის შიდა ფაქტორები უკვე აღარ არსებობს. თითოეული ასეთი განცხადება მიმართულია იმისკენ, რომ ასულდგმულონ ოპოზიციის დღის წესრიგი და წინასაარჩევნოდ რაც შეიძლება მაღლა აწიონ პოლიტიკური ტემპერატურა“, - განაცხადა წილოსანმა.ცნობისთვის, აშშ-ის ჰელსინკის კომისია თავის განცხადებაში აღნიშნავს, რომ ქართველი ხალხი იმსახურებს მთავრობას, რომელიც პატივს სცემს მათ უფლებას დემოკრატიულად აირჩიონ თავიანთი ლიდერები.განცხადების თანახმად, საქართველოს მთავრობის ავტორიტარული ტრაექტორია საფრთხის ქვეშ აყენებს ქვეყნის დემოკრატიულ მომავალს და ევროატლანტიკურ მისწრაფებებს.განცხადების ხელმომწერები არიან, ჰელსინკის კომისიის თავმჯდომარე, კონგრესმენი ჯო უილსონი (რესპუბლიკური პარტია), კონგრესმენი სტივ კოენი (დემოკრატიული პარტია), რიჩარდ ჰადსონი (რესპუბლიკური პარტია), კონგრესმენი მარკ უიზი (დემოკრატიული პარტია) და აშშ-ის სახელმწიფო მდივნის დემოკრატიის, ადამიანის უფლებებისა და შრომის საკითხებში თანაშემწე, დაფნა რენდი.

ჰელსინკის კომისიის განცხადება ქმნის საფუძველს, დასანქცირდეს ივანიშვილი და მისი რეჟიმი, თუ შეეცდებიან შეეწინააღმდეგონ ქართველი ხალხის თავისუფალი ნების დაფიქსირებას და გამოხატვას 26 ოქტომბერს,- ამის შესახებ კოალიცია „ძლიერი საქართველოს“ ერთ-ერთმა ლიდერმა, სალომე სამადაშვილმა განაცხადა.მისივე განმარტებით, „ივანიშვილი უკვე მიხვდა, რომ მისთვისვე სჯობია, დემოკრატიულ პროცესს მისცეს შანსი“.„ვხედავთ, დღეს მთელი დემოკრატიული სამყარო ქართველ ხალხს ეუბნება, რომ დღეს რუსული, ავტოკრატიული რეჟიმი გვმართავს; რომ ამ რეჟიმის თავიდან მოშორების გარეშე ქართველ ხალხს არ შეიძლება რაიმე იმედი ჰქონდეს, რომ მისი მომავალი იქნება დაცული, დემოკრატიული, მდიდარი და ევროპული. მათ შორის, ჰელსინკის განცხადება ძალიან მნიშვნელოვანია იმ თვალსაზრისით, რომ ის ქმნის საფუძველს, დასანქცირდეს ივანიშვილი და მისი რეჟიმი, თუ შეეცდებიან შეეწინააღმდეგონ ქართველი ხალხის თავისუფალი ნების დაფიქსირებას და გამოხატვას 26 ოქტომბერს. მაგრამ დარწმუნებული ვარ, რომ ივანიშვილი უკვე მიხვდა, რომ მისთვისვე სჯობია, შანსი მისცეს დემოკრატიულ პროცესს და საკმაოდ უდრტვინველად დაემორჩილება ქართველი ხალის ნებას“,- განაცხადა სალომე სამადაშვილმა.ამასთან, კოალიციის ერთ-ერთი ლიდერი გამოეხმაურა არასამთავრობო ორგანიზაციების ნაწილის მიერ „უცხოური გავლენის გამჭვირვალობის შესახებ“ კანონის ადამიანის უფლებათა ევროპულ სასამართლოში გასაჩივრების გადაწყვეტილებას. მისი თქმით, სასამართლოს კანონზე მსჯელობა არ მოუწევს, რადგან „გამარჯვების შემდეგ ოპოზიცია მას გააუქმებს“.„26 ოქტომბერს ოპოზიცია აპირებს, რომ გაიმარჯვოს და პირველი, რასაც ახალარჩეული პარლამენტი გააკეთებს, ეს იქნება „რუსული კანონის“ გაუქმება. ამიტომ, დარწმუნებული ვარ, რომ სტრასბურგის სასამართლოს არ მოუწევს რუსული კანონის შესახებ მსჯელობა, რადგან ჩვენ მას გავაუქმებთ ძალიან მალე, სულ რამდენიმე კვირაში“,- განაცხადა სამადაშვილმა.ცნობისთვის, აშშ-ის ჰელსინკის კომისიის განცხადების მიხედვით, „ქართველი ხალხი იმსახურებს მთავრობას, რომელიც პატივს სცემს მათ უფლებას, დემოკრატიულად აირჩიონ თავიანთი ლიდერები“. ამასთან, აღნიშნულია, რომ „მთავრობის ავტორიტარული ტრაექტორია საფრთხის ქვეშ აყენებს საქართველოს დემოკრატიულ მომავალს“.